ሚኒስትሪ ጥዕና፡ ናውቲ ሕክምና ብሓገዝ ረኺቡ

ሚኒስትሪ ጥዕና፡ ካብ መንግስቲ ግብጺ ዝተበርከተ ናውቲ ሕክምና፡ ብ15 ለካቲት ኣብ ዝተኻየደ ስነስርዓት ተረኪቡ።

እቲ ሓገዝ፡ ኣስታት 2.8 ሚልዮን ጅኔ ግብጺ (ኣስታት 160 ሽሕ ዶላር) ዝትመን ኮይኑ፡ ኣብ ምሕጻብ ኲሊት – ‘ድያሊስስ’ ዘገልግላ 6 ማሽናትን ንዓአን ዘገልግል ከሚካላትን ካልእን የጠቓልል።

ሚኒስተር ጥዕና ኣሚና ኑርሑሴን፡ ኣብ ሞንጎ መንግስታት ኤርትራን ግብጽን ኣብ መዳይ ጥዕና ዘሎ ዝምድና – ካብ ነዊሕ ዝጸንሐ ምዃኑ ብምሕባር፡ እቲ ብሓገዝ ዝተበርከተ መሳርሒ፡ ነቲ ኣብ ሕክምና ኲሊት ክወሃብ ዝጸንሐ ኣገልግሎት ሓጋዚ ከምዝኾነ ገሊጻ።

ኣምባሳደር ሪፓብሊክ ግብጺ ኣብ ኤርትራ፡ ኣሰይድ ያስር ሃሽም ብወገኑ፡ እቲ ኣቚሑ – ኤርትራ ኣብ መዳይ ጥዕና ንትገብሮ ዘላ ጻዕሪ ኣበርክቶ ክህልዎ ዘለዎ እምነት ገሊጹ።

ድሕሪ’ቲ ናይ ምርኽኻብ ስነስርዓት፡ ሚኒስተር ጥዕና ኣሚና ኑርሕሴንን ኣምባሳደር ሪፓብሊክ ግብጺ ያስር ሃሽምን፡ ብካልኦት ሰብ-መዚን ሞያውያንን ሚኒስትሪ ጥዕና ተሰንዮም፡ ነተን ኣብ ዝሓለፈ ዓመት ንሆስፒታል ብርሃን ዓይኒ ዝተበርከታ ማሽናት ድሕሪ ምዕዛብ፡ ኣብ ካልኦት ትካላት ጥዕና ዑደት ኣካዪዶም።