ደቡብ – ትምህርቲ ምምራሕ መኪና ብዕቱብ ክተሓዝ ተሓቲቱ

ኣብ ዞባ ደቡብ ዝነጥፋ ኣብያተትምህርቲ ምምራሕ መኪና፡ ብቑዓትን ሓላፍነታውያንን መራሕቲ መካይን ብምፍራይ ኣብ ምንካይ ሓደጋታት ተራአን ከዕዝዛ፡ ሓላፊ ጨንፈር መጐዓዝያ ምድሪ ዞባ ደቡብ ኣቶ መሓሪ ሃብተ ጸዊዑ።

ኣብ መንደፈራ፡ ድባርዋ፡ ዓዲ-ዃላ፡ ደቀምሓረ፡ ሰገነይቲ፡ ዓዲ-ቐይሕን ሰንዓፈን፡ ብዝተፈላለየ ደረጃታት ዘምህራ 22 ኣብያተ-ትምህርቲ ምምራሕ መኪና ከምዘለዋ ዝገለጸ ኣቶ መሓሪ፡ ኣብ’ቲ ዝህባኦ ኣገልግሎት፡ ካብ ንረብሓታተን ድሕነት ከቐድማ ተላብዩ።

“75 ሚእታዊት ካብ ተማሃሮኣ ዘየሕለፈት ቤት-ትምህርቲ፡ መርኣያ ዘይብቕዓታ እዩ” ዝበለ ኣቶ መሓሪ፡ ዝተዋህባ ፍቓድ ክሳብ ናይ ምስራዝ ውሳነ ክብየነላ ከምዝኽእል ኣገንዚቡ። ተሳታፍነት ደቂ-ኣንስትዮ – ትሑትን ኣብ ካልኣይ ደረጃ ዝተሓጽረን ኮይኑ ምህላዉ ብምሕባር ከኣ፡ ከም ሞያ ሒዘን ናብ ሳልሳይን ልዕሊኡን ደረጃታት ከቋምታ መኺሩ።

ወነንቲ ኣብያተ-ትምህርቲ ምምራሕ መኪና ብወገኖም፡ ሓላፍነቶም ንምትግባር ብግብሪን ክልሰ-ሓሳብን ዝተሰነየ ግቡእ ትምህርቲ ንምሃብ ብዕቱብ ከምዝሰርሑ ብምርግጋጽ፡ ተመሃሮ እውን ዝቐሰምዎ ትምህርቲ ኣብ ግብሪ ንምውዓል ብዝለዓለ ክሰርሑ ተላብዮም።